Gjykata e Apelit të Posaçëm dënoi me 1 vit burgim kryebashkiakun e Rrogozhinës, Edison Memolla, dënim që duhet ta shlyejë në qelitë e paraburgimit. Ai u cilësua fajtor për akuzën e korrupsionit aktiv në zgjedhje. Ndërsa si dënim plotësues iu hoq e drejta të ushtrojë funksione publike për 5 vite me radhë. SPAK do të nxjerrë urdhrin e ekzekutimit dhe me burgosjen e Memollës, Bashkia Rrogozhinë mbetet pa kryetar.
Treshja gjykyese e kryesuar nga Florjan Kalaja me anëtare gjyqtaret Daniela Shirka dhe Igerta Hysi lanë fuqi dënimin me nga 1 vit burgim secili për Ndriçim Tafxhafën dhe Blerim XHamanin, ndërsa me shërbim prove për Isuf Toskun.
Edison Memolla u akuzua nga SPAK se ndikoi tek elektricisti Blerim Xhamani, që ky i fundit të mos i ndërpriste energjinë elektrike një gruaje, me qëllim që ajo të votonte në favor të tij ne zgjedhjet e pjesshme lokale të datës 6 mars 2022. Po në këmbim të votës, SPAK thotë se Memolla ka komunikuar me Xhamanin për punësime në Bashkinë Rrogozhinë.
Xhamami akuzohet se bashkëpunoi me të pandehurin Isuf Tosku dhe falsifikuan të dhënat në procesverbalin e ndërprerjes së energjisë elektrike, pasi në fakt nuk ia ndërprenë abontit debitor. I pandehuri Ndriçim Tafxhafa, u akuzua se i premtoi një shtetaseje për shlyerje të detyrimeve ndaj OSHEE dhe për strehim, duke i kërkuar të votonte në favor të një kandidati në ato zgjedhje të pjesshme lokale.
