Gjykata e Posaçme e Apelit urdhëron SPAK të hetojë regjistrojë procedim penal ndaj kryetares së Bashkisë së Lushnjes, Eriselda Sefa.
Kjo e fundit ishte kallëzuar nga një qytetar për akuzat e falsifikimit të dokumentave dhe veprime që pengojnë zbulimin e të vërtetës.
SPAK kishte vendosur mosfillimin e procedimit penal për rastin në fjalë. Kallëzuesi iu drejtua gjykatës së Posaçme, e cila vendosi të miratonte vendimin e strukturës antikorrupsion. Apeli i Posaçëm e prishi këtë vendim duke urdhëruar SPAK të regjistrojë procedim penal dhe të nisë hetimet për rastin në fjalë.
Kryetarja e Bashkisë është kallëzuar lidhur me procedurën e dhënies me qiran ë një pasurie publike në rrugën “Kongresi i Lushnjes”.
Njoftimi
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Miliana Muça, më datë 30.09.2025, shpalli vendimin mbi çështjen penale nr. 195 akti, datë 02.09.2025 regjistrimi, mbi ankimin e shtetasit A.H., me objekt: “Ankim ndaj vendimit nr. 268, datë 04.06.2025 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Shfuqizimin e vendimit të mosfillimit të procedimit penal datë 24.04.2025, të Prokurorisë së Posaçme kundër Korrupsionit dhe Krimit të Organizuar, në lidhje me kallëzimin penal nr. 81, datë 14.04.2025” dhe vendosi:
- Ndryshimin e vendimit nr. 268, datë 04.06.2025 të Gjykatës së Posaçme të Shkallës së Parë për Korrupsionin dhe Krimin e Organizuar, duke pranuar ankimin e ankuesit A.H. dhe duke urdhëruar Prokurorinë e Posaçme kundër Korrupsionit dhe Krimit të Organizuar të regjistrojë procedimin penal dhe të kryeje hetime.
- Një kopje e vendimit t’iu komunikohet palëve.
U vendos në Tiranë, me datë 30.09.2025 ora 12:45.
