Ambasada e Shteteve të Bashkuara ka shpërndarë një video lidhur me përfundimin e trajnimit të udhëhequr nga FBI për hetuesit e SPAK dhe BKH, ku mbajti një fjalë edhe e Ngarkuara me Punë, Nancy VanHorn.
Në pamjet e publikuara nga ceremonia, e zhvilluar në ambientet e Akademisë së Sigurisë, vihet re mungesa e Drejtorit të Përgjithshëm të Policisë së Shtetit, Ilir Proda. Ndërkohë, në aktivitet ishin të pranishëm drejtuesit e institucioneve kyçe në luftën kundër krimit të organizuar dhe trafikut të narkotikëve, përfshirë kreun e SPAK, Klodian Braho, drejtuesin e BKH, Joni Keta, si dhe drejtues të tjerë institucionalë. Nr.1 i Policisë së Shtetit ishte praktikisht “i fshirë” si nga takimi, ashtu edhe nga video-mesazhi i Ambasadës Amerikane.
Arsyet e mungesës së Drejtorit të Përgjithshëm të Policisë së Shtetit nuk dihen zyrtarisht, por shmangia e kreut të një prej institucioneve më të rëndësishme në vend, që ka rol kyç në luftën kundër narkotikëve dhe krimit të organizuar, janë të qarta për ata që dinë të shohin përtej njoftimeve formale.
Drejtori i Policisë së Shtetit, Ilir Proda, ka çështje të hapura me drejtësinë. VNA ka raportuar më herët se SPAK i ka sekuestruar telefonin Drejtorit të Përgjithshëm të Policisë së Shtetit në kuadër të një hetimi për daljen e sekretit hetimor gjatë një aksioni, në kohën kur ai ishte drejtues i Policisë në Elbasan.
Emri i Prodes është përfolur gjithashtu për lidhje me personazhe të krimit të organizuar, si dhe për përgjegjësinë direkte të tij në ditën kur mbështetësit e Erion Veliajt cenuan perimetrin e sigurisë së Prokurorisë së Posaçme gjatë seancës për masën e arrestit ndaj tij. Emri i Ilir Prodes rezulton aktiv edhe në dosje të tjera të nxehta që ndodhen në duart e prokurorëve.
Këto zhvillime duket se kanë çuar në shmangien e tij nga aktivitetet zyrtare të Ambasadës së SHBA-së, e cila së fundmi po mbështet pa dorashka SPAK dhe BKH në hetimet dhe punën që po kryejnë kundër krimit të organizuar dhe korrupsionit.
