Kreu i SPAK, Altin Dumani, ka reaguar sot për herë të parë lidhur me draftin e ri të Kodit Penal, gjatë një takimi me gazetarët ku u ndal te mënyra se si është ndërtuar dhe komunikuar kjo nismë ligjore. Ai konfirmoi se SPAK nuk ka qenë i përfshirë në hartimin e draftit dhe se institucioni që ai drejton ende nuk e ka marrë zyrtarisht dokumentin për të dhënë mendim.
“Ne nuk jemi përfshirë në hartimin e këtij drafti. Ende nuk na është vënë në dispozicion. Kur të na vihet në dispozicion, do të japim mendimin tonë”, deklaroi Dumani.
Shefi i SPAK theksoi se debati për një kod të ri penal është i pritshëm, si në aspektin profesional ashtu edhe në atë shoqëror, por sipas tij, diskutimi duhet të kishte nisur ndryshe: me një pyetje thelbësore – A ishte vërtet i nevojshëm një kod i ri penal?
“Mendoj se ka nevojë për ndryshime, por kjo nuk do të thotë domosdoshmërisht që duhet një kod krejtësisht i ri. Duhej bërë një debat i gjerë: a mund të bëheshin ndryshimet në Kodin aktual?” – u shpreh Dumani.
Ai tha se ka ndjekur edhe reagimin e Prokurorit të Përgjithshëm Olsian Çela dhe shtoi se në disa aspekte është dakord me qëndrimet e tij.
Qëndrimi i Dumanit shton zërat institucionalë që kërkojnë më shumë transparencë dhe përfshirje në reformimin e legjislacionit penal, një proces që tashmë ka ngjallur reagime të shumta brenda sistemit të drejtësisë dhe më gjerë.
