Gjykata e Apelit pritet të shqyrtojë ditën e hënë kërkesën e Gjon Shkambit për heqjen e masës së sigurisë të vendosur ndaj tij nga shkalla e parë.
Shkambi akuzohet si bashkëpunëtor i nipit të tij, Elvis Shkambi, i cili vrau gjyqtarin Astrit Kalaja. Seanca pritet të nisë në orën 10:00, me gjyqtar relator Genti Shalën.
Ndërkohë, Elvis Shkambi, autori i dyshuar i vrasjes, nuk ka ankimuar vendimin e Gjykatës së Shkallës së Parë, duke pranuar masën e “arrestit me burg” pa afat.
Në të njëjtën seancë, Apeli do të shqyrtojë edhe ankimin e Banush Goxhajt, punonjës sigurie në Gjykatën e Apelit, i akuzuar për shpërdorim detyre.
Vrasja e gjyqtarit ndodhi më 6 tetor, kur Elvis Shkambi qëlloi me tre plumba në sallën e gjyqit, menjëherë pas vendimit të dhënë kundër familjes Shkambi për një çështje pronësie. Gjatë ngjarjes, 31-vjeçari plagosi edhe dy persona të tjerë të përfshirë në konfliktin për pronësinë.
