Gjykata e Rrethit Gjyqësor Dibër ka vendosur masën e sigurisë “arrest me burg” për dy vëllezërit Kristi dhe Aleksandër Bushgjoka, të akuzuar për rrëmbimin dhe vrasjen e 23-vjeçarit Renis Dobra, ngjarje e ndodhur më 8 korrik 2025.
Të dy u arrestuan një ditë më parë gjatë një operacioni të koduar “Operacionalja 68”, të zhvilluar në Tiranë nga Forcat Speciale RENEA dhe Forca Operacionale e Policisë së Shtetit.
Burime nga gjykata bëjnë me dije se seanca gjyqësore është shoqëruar me tensione dhe përplasje verbale mes të akuzuarve dhe trupit gjykues. Debatet nisën sapo prokuroria kërkoi masën e sigurisë më të rëndë, ndërsa vëllezërit mohuan akuzat dhe u përfshinë në përplasje me trupin gjykues.
Rrëmbimi dhe ekzekutimi i Renis Dobrës
Sipas hetimeve paraprake, vëllezërit Kristi dhe Aleksandër Bushgjoka, së bashku me vëllain tjetër të tyre, Fatjon Bushgjoka, dhe 55-vjeçarin Petrit Çakrri (të dy të arrestuar më herët), dyshohet se kanë marrë pjesë në rrëmbimin dhe më pas vrasjen brutale të 23-vjeçarit Renis Dobra. Trupi i pajetë i të riut u gjet në liqenin e Ulzës, në zonën e Shkopetit, disa ditë pas zhdukjes.
Burime nga grupi hetimor bëjnë me dije se vrasja është kryer me litar – një strangulim i planifikuar me kujdes dhe i realizuar pas disa ditësh ndjekjeje.
Detaje tronditëse nga hetimet: makinat me qira dhe fshehja e trupit
Hetimet kanë zbuluar një plan të mirëmenduar nga autorët, të cilët për disa ditë rresht përdorën makina të ndryshme me qira – të marrë në Rinas dhe Yzberisht – për të ndjekur lëvizjet e viktimës dhe për të shmangur gjurmët. Autorët tentuan të hiqnin GPS-at nga automjetet, por nuk ia dolën.
Përmes pamjeve të kamerave të sigurisë dhe sinjaleve GPS, policia arriti të rindërtonte itinerarin e autorëve dhe të dokumentonte lëvizjet e tyre deri në momentin e vrasjes. Dyshohet se pas krimit, autorët futën trupin e pajetë të 23-vjeçarit në një automjet dhe e hodhën në liqenin e Shkopetit për të fshehur ngjarjen. Trupi doli në sipërfaqe disa ditë më vonë, ndërsa mjeti përfundoi në ujë.
Aleksandër Bushgjoka, më i vogli nga tre vëllezërit, dyshohet gjithashtu se ndihmoi në përpjekjen për të larguar vëllain tjetër, Fatjonin, drejt Kosovës, pas ngjarjes.
Operacioni “Operacionalja 68” dhe arrestimi në Tiranë
Kapja e dy vëllezërve u bë gjatë një operacioni të mirëorganizuar nga strukturat speciale të Policisë. Ata u lokalizuan në një apartament në Tiranë dhe u ndaluan nga RENEA pa asnjë rezistencë. Sipas njoftimit zyrtar të Policisë së Shtetit, të dy ishin shpallur në kërkim për veprën penale “Rrëmbimi ose mbajtja peng e personit”, kryer në bashkëpunim. Pas ndalimit, ata janë transferuar në Drejtorinë Vendore të Policisë Dibër për veprime të mëtejshme procedurale.
Akuzat dhe vijimi i hetimeve
Prokuroria e Dibrës ka ngritur ndaj katër të arrestuarve akuzat për “Vrasje me paramendim”, kryer në bashkëpunim, si dhe “Rrëmbim dhe mbajtje peng e personit”. Hetimet vijojnë për të zbardhur motivet dhe rrethanat e plota të ngjarjes makabre, ndërsa nuk përjashtohet përfshirja e personave të tjerë në këtë krim të rëndë që ka tronditur opinionin publik.
