Gjykata e Elbasanit shpall të pafajshëm Donald Hoxhën, i akuzuar për vrasje me paramendim në rolin e ndihmësit për ish-policin Roland Rexhepi i njohur si Doda. Prokuroria kishte kërkuar dënimin me 16 vite burgim për të pandehurin, pasi arsyetonte se ka prova që e implikojnë në ngjarjen e ndodhur verën e 2009.
Sipas hetuesve, Donald Hoxha kishte trasportuar nga Durrësi në Elbasan automjetin që u përdor në vrasje. Hoxha u shpall në kërkim dhe pas arrestimit në Britaninë e Madhe u ekstradua drejt Shqipërisë. Këtë të martë ai ka marrë pafajësinë, por prokuroria thotë se do ta ankimojë vendimin. Për implikim në vrasjen e ish-policit të njohur si Doda janë dënuar Armand Llakaj, Marjus Tafaj dhe Florind Shabani.
