Gjykata e Posaçme Kundër Korrupsionit dhe Krimit të Organizuar ka pranuar kërkesën e Prokurorisë së Posaçme dhe ka vendosur vazhdimin e masës së sigurimit “Arrest në burg” për 10 anëtarët e grupit kriminal të njohur si “Rraja”.
Vendimi u mor nga trupi gjykues i përbërë nga gjyqtarja Etleva Deda, bazuar në Kodin e Procedurës Penale dhe ligjin penal për grupet e strukturuara kriminale. Personat e përfshirë, mes të cilëve Islam Sefa (alias Xaka), Rexhep Rraja, Agim Nina (alias Lorenc Selmani), Përparim Rraja, Gazmir Rraja, Zamir Aliaj (alias Çoku), Aldo Gjini (alias Iamandri), Sokol Qaja, Jani Çavo dhe Marvin Bushati, dyshohen për kryerjen e veprave penale të “Trafikimit të narkotikëve” në bashkëpunim dhe në formën e veçantë të grupit të strukturuar kriminal.
Gjykata konfirmoi gjithashtu arrestimin në flagrancë dhe caktimin e masës së sigurisë “Arrest në burg” për Marvin Bushatin, i dyshuar edhe për “Mbajtje pa leje dhe prodhim të armëve, armëve shpërthyese dhe municionit”.
SPAK goditi grupin kriminal në Fushë-Krujë, ku mes të arrestuarve ishte edhe djali i ish-deputetit të PS-së, Rrahman Rraja. Grupi “Rraja” është akuzuar për trafik droge nga viti 2020 dhe si grup i strukturuar kriminal.
