Prokuroria e Tiranës ka ndërmarrë një operacion të koordinuar ndaj disa call center-ave të dyshuar për përfshirje në një skemë mashtrimi ndërkombëtar, duke çuar në arrestimin e disa personave të lidhur me aktivitetin e dyshimtë. Deri më tani janë vënë në pranga:
Eduart Dalla
Tedi Agastra
Mateo Hoxha
Sipas burimeve hetimore, operacioni është shtrirë në disa ambiente të përshtatura si call center, të shpërndara në zona të ndryshme të kryeqytetit. Dy prej tyre ndodheshin në një kompleks biznesi në Tiranë, ndërsa një tjetër në afërsi të Kopshtit Zoologjik.
Gjatë kontrolleve të ushtruara nga autoritetet, është sekuestruar një shumë e konsiderueshme parash, rreth 1 milion euro cash, që dyshohet se lidhen me aktivitetin e paligjshëm.
Hetimet paraprake sugjerojnë se skema kishte në shënjestër shtetas të huaj, përfshirë qytetarë nga Austria, Italia, Spanja, Greqia, Kanadaja dhe Shtetet e Bashkuara të Amerikës. Sipas dyshimeve, ata janë mashtruar përmes metodave të ndryshme telefonike të përdorura nga operatorët e call center-ave.
