Kanë dalë detaje të tjera në lidhje me operacionin policor që është duke u zhvilluar prej mëngjesit të sotëm në fshatin Orosh të Mirditës, ku forcat e rendit kanë rrethuar një banesë të braktisur prej kohësh, e cila ndodhet pranë shkollës së fshatit.
Dyshohet se dy persona me rrezikshmëri të lartë janë strehuar në këtë banesë prej rreth një muaji. Njëri prej tyre ishte strehuar në banesën e gjyshit të tij.
Policia dyshon se personat mund të jenë të armatosur dhe për këtë ka kërkuar mbështetjen e forcave speciale RENEA.
Për shkak të largësisë së zonës dhe mungesës së valëve telefonike, informacionet mbeten të kufizuara, ndërsa forcat e rendit po vijojnë kontrollet me kujdes të shtuar.
