Numri i viktimave nga aksidenti i rëndë i ndodhur një ditë më parë në autostradën Levan–Vlorë ka shkuar në dy. Pas mesnate ka ndërruar jetë edhe pasagjeri që ndodhej në kamionçinën e përfshirë në përplasje, shtetasi Artan Muho. Ai u transportua në gjendje të rëndë shëndetësore në spitalin e Vlorës, por pavarësisht ndërhyrjes së mjekëve, nuk arriti t’u mbijetojë plagëve.
Kujtojmë se në aksident humbi jetën menjëherë drejtuesi i kamionçinës, i cili mbeti i bllokuar në mjet pas përplasjes. Ngjarja ndodhi mesditën e së hënës, pranë fshatit Panaja, kur një automjet tip Dacia, i drejtuar nga një shtetase e huaj, u përplas me kamionçinën, duke shkaktuar tragjedinë.
