Portieri spanjoll i Interit, Josep Martinez, ndodhet nën hetim pas aksidentit tragjik që ndodhi në mëngjesin e së martës pranë qytetit të Como-s, ku humbi jetën Paolo Saibene, 81 vjeç. Sipas raportimeve të para, Martinez ishte duke udhëtuar me makinën e tij BYD, një SUV hibrid, në drejtim të qendrës stërvitore të Interit në Appiano Gentile, kur ndodhi përplasja fatale.
Hetimet paraprake sugjerojnë se viktima mund të ketë shfaqur shenja destabilizimi vetëm pak metra përpara ngjarjes dhe më pas ka hyrë papritur në korsinë e automjetit të portierit. Forcat e policisë lokale kanë marrë të gjitha të dhënat e nevojshme për rindërtimin e dinamikës së aksidentit dhe për të përcaktuar përgjegjësitë ligjore.
Në vendngjarje, mjeti i Martinezit u sekuestrua dhe rruga u bllokua për orë të tëra, ndërsa hetuesit po analizojnë çdo element që mund të ndihmojë në sqarimin e rrethanave të ngjarjes.
Në aspektin juridik, ndaj tij do të aplikohet neni për vrasje në aksident rrugor, një dispozitë që parashikon dënime të ndryshme në varësi të nivelit të fajësisë së drejtuesit të mjetit. Nëse do të vërtetohet se Martinez ka shkelur rregullat e qarkullimit rrugor, ai mund të përballet me një dënim nga 2 deri në 7 vjet burg, si dhe pezullim të patentës. Në rast se përgjegjësia e tij konsiderohet e lehtë dhe jo rrugore, dënimi mund të ulet në 6 muaj deri në 5 vjet, duke përfshirë edhe një gjobë.
Megjithatë, burime pranë hetimit bëjnë me dije se rrethanat e ngjarjes sugjerojnë më shumë një aksident të pastër sesa një shkelje nga ana e portierit. Nëse do të konfirmohet se sjellja e këmbësorit ka qenë e paparashikueshme dhe e jashtëzakonshme, atëherë Martinez nuk do të konsiderohet përgjegjës penalisht. Në këtë rast, çështja mund të arkivohet, ndërsa dëmshpërblimi do të përballohet nga kompania e sigurimit. Sipas ligjit italian, kur sjellja e viktimës është e paparashikueshme, drejtuesi i mjetit nuk mban përgjegjësi për pasojat, me kusht që të provohet se ka respektuar të gjitha rregullat e qarkullimit dhe ka vepruar me kujdesin e nevojshëm.
