Një aksident i rëndë automobilistik i ka marrë jetën dy motrave Dhimaku mbrëmjen e djeshme në aksin rrugor Sarandë–Delvinë.
Ngjarja u regjistrua rreth orës 20:15 në vendin e njohur si “Pularia”, ku mjeti tip Lancia, i drejtuar nga Ela Dhimaku, 22 vjeçe, u përplas me një automjet tip Audi, në drejtimin e Kevi Norrës, 23 vjeç. Nga përplasja fatale humbën jetën në vend Ela dhe Rezi Dhimaku, 20 vjeçe, e cila ndodhej pasagjere në makinë. Ndërkohë, një vajzë tjetër që udhëtonte bashkë me to, Antonela Zhupa, 24 vjeçe, mbeti e plagosur rëndë dhe u transportua me urgjencë drejt Tiranës për trajtim mjekësor.
Forca të shumta policie, ambulanca dhe zjarrfikëse mbërritën menjëherë në vendngjarje për të nxjerrë trupat dhe për t’i ardhur në ndihmë të plagosurve.
Shkaqet e aksidentit vijojnë të mbeten të paqarta, ndërsa grupi hetimor po punon për zbardhjen e rrethanave të ngjarjes.
