Një aksident rrugor i rëndë është shënuar këtë të premte në autostradën Lushnje–Fier, pranë zonës së Savrës, në kahun e drejtimit për në Fier.
Sipas informacioneve paraprake, një automjet luksoz tip fuoristradë “Bentley” është përplasur me një kamion, pasi shoferi i “Bentley”-t ka tentuar ta parakalojë mjetin e tonazhit të rëndë. Përplasja ka ndodhur nga pas, duke shkaktuar dëmtime serioze në pjesën e përparme të fuoristradës.
Si pasojë e aksidentit, një person ka mbetur i plagosur rëndë dhe është transportuar me urgjencë në spitalin e Lushnjes, ku ndodhet nën kujdes intensiv mjekësor. Identiteti i të plagosurit nuk është bërë ende i ditur.
Menjëherë pas ngjarjes, policia ka mbërritur në vendin e aksidentit dhe ka nisur hetimet për zbardhjen e plotë të rrethanave. Trafiku në këtë segment ka pësuar ngarkesa të përkohshme, ndërsa autoritetet kanë bërë apel për kujdes të shtuar në drejtimin e automjeteve, sidomos në rrugët me fluks të lartë.
Hetimet vazhdojnë.
