Me 16 shtator, Gjykata Kushtetuese do të shqyrtojë kërkesat e ish-administratorit të kompanisë DIA, Kastriot Ismailaj, i cili njihet për njohje dhe miqësi me ish-presidentin e vendit Ilir Meta, i cili ndodhet në qeli prej tetorit të 2024.
Biznesmeni Ismailaj kërkon shfuqizimin e vendimeve të gjykatave, që e kanë gjetur fajtor dhe dënuar me 11 vite burgim për akuzat e mashtrimit me pasoja të rënda dhe pastrimit të parave. Ai dyshohet se përvetësoi afër 5 mln euro nga zbatimi i marrëveshjes që kompania DIA kishte me kompaninë çeke CEZ për mbledhjen e borxheve.
Ismailaj e ka përfunduar këtë dënim dhe ka dalë në liri, por pretendon se vendimet ndaj tij janë antikushtetuese.
Gjykata Kushtetuese do ta shqyrtojë çështjen vetëm mbi bazë dokumentash.
Njëherazi Ismailaj kërkon edhe shfuqizimin e konfiskimit të afro 4.2 mln USD, 450 mijë euro dhe 12 mln lekë të sekuestruara në kohën kur ndaj tij u zhvilluan hetimet.
Afera CEZ-DIA është një nga akuzat që rëndon edhe ndaj ish-presidentit Ilir Meta, i cili dyshohet të ketë ndikuar në lidhjen e kontratës mes DIA-s së Kastriot Ismailajt dhe CEZ.
