Ish-ministri i Shtetit për Pushtetin Vendor dhe ish-nënkryetari i Bashkisë së Tiranës, Arbjan Mazniku, ka dëshmuar sot në Gjykatën e Posaçme kundër Korrupsionit në kuadër të procesit gjyqësor për aferën e njohur si "5D".
Gjatë dëshmisë së tij, Mazniku deklaroi se gjatë periudhës 2019-2022, kur mbante postin e nënkryetarit të Bashkisë së Tiranës, ka pasur kompetenca për verifikimin përfundimtar të procedurave të tenderimit, por jo përmbajtjen e lëndës së kërkesave.
"Sipas ligjit, nuk merresha me lëndën e kërkesës, por vetëm verifikimin e hallkave të procesit. Raporti përmbledhës për tenderat ishte përgatitur nga ekspertët përkatës", tha Mazniku.
Ai shtoi se gjatë detyrës së tij firmoste dhjetëra dokumente në ditë dhe kujdesej që çdo procedurë të kishte firmat dhe detyrat e përmbushura nga përgjegjësit përkatës, përpara se ta certifikonte vetë.
"Miratimi im ishte në fakt një certifikim që hallkat administrative kishin bërë detyrat e tyre", theksoi ai.
I pyetur për lidhjet me personat e përfshirë në aferën 5D, Mazniku pranoi se i njihte Redi Mollën, Mariglen Qaton dhe Taulant Tushën, por theksoi se marrëdhëniet me ta kanë qenë vetëm profesionale.
"Me Redi Mollën kam pasur kontakte telefonike, ishim kolegë. Nuk kam pasur dijeni që Molla, Qato apo Tushe të kenë pasur interesa financiare", deklaroi Mazniku.
Redi Molla dhe Mariglen Qato janë të akuzuar nga SPAK si pronarët de facto të kompanisë 5D, e cila ka përfituar tendera të shumtë nga Bashkia e Tiranës.
