Një ditë pasi SPAK zyrtarisht çoi në Gjykatë dosjen ndaj kryebashkiakut Erion Veliaj, bashkëshortes së tij, Ajola Xoxa dhe disa biznesmenëve të rëndësishme në vend, fati i tij tashmë dihet. Por paralelisht me SPAK, kjo gjë u vërtetua sot nga kreu i Partisë Socialiste Edi Rama gjatë Asamblesë me shpalljen e Ogerta Manastiriliut për Bashkinë e Tiranës.
Ai është ky fundi i Erion Veliajt?
Gazetarja Klodiana Lala ka zbuluar të tjera detaje të rëndësishme nga hetimi ndaj ish-kryetarit të Bashkisë Tiranë, Erion Veliaj, bashkëshortes së tij Ajola Xoxa dhe një grupi të gjerë bashkëpunëtorësh, mes të cilëve biznesmenë dhe ish-zyrtarë të njohur.
E ftuar në emisionin “Të Paekspozuarit” në MCN TV, Lala konfirmoi se hetimet janë përfunduar dhe se Veliaj përballet me 13 akuza, më shumë se çdo person tjetër në dosje. Ndër akuzat më të rënda është ajo e “shpërdorimit të detyrës”, në lidhje me një leje ndërtimi për një pallat shumëkatësh, ku sipas SPAK, ka interesa direkte Ajola Xoxa.
“Janë 30 të pandehur dhe 12 shoqëri. Ka shumë bashkëpunëtorë dhe familjarë të zonjës Xoxa mes të pandehurve. Akuza e re për Veliajn lidhet me dhënien e një lejeje ndërtimi ku ka interesa bashkëshortja e tij”, u shpreh Lala.
Sipas hetuesve të SPAK, çifti Veliaj-Xoxa dyshohet se ka përfituar fonde të mëdha, të cilat janë kanalizuar përmes kompanive dhe OJF-ve të kontrolluara nga zonja Xoxa. Po ashtu, përmendet kompania “Rametal” e biznesmenit Elman Abule si pjesë e skemës së dyshuar për pastrim parash dhe qarkullim të shumtë të parave cash.
Në listën e të pandehurve është përfshirë edhe ish-deputetja Klotilda Bushka.
Nga ana tjetër, Veliaj ka mohuar të gjitha akuzat, përmes avokatëve të tij, duke deklaruar se ndaj tij nuk ka prova konkrete, se është keqtrajtuar gjatë shoqërimit në spital dhe se nuk i është lejuar takimi me avokatët ndërkombëtarë.
Çështja do të shqyrtohet nga gjyqtarja Etleva Deda, një emër me përvojë në sistemin e drejtësisë që nga koha e Krimeve të Rënda.
