30 personat e arrestuar gjatë megaoperacionit policor “First Day” kanë mbërritur sot në Gjykatën e Elbasanit, ku ishte parashikuar të zhvillohej seanca për caktimin e masave të sigurisë.
Operacioni, i drejtuar nga Prokuroria dhe i zhvilluar gjatë natës dhe mëngjesit të së hënës, më 8 shtator, u shtri në disa qytete të qarkut të Elbasanit. Si rezultat, u arrestuan 30 persona, ndërsa një tjetër u la nën hetim në gjendje të lirë. Për 25 prej tyre ishin lëshuar urdhër-arreste nga Gjykata e Elbasanit, ndërsa 5 të tjerë u kapën në flagrancë gjatë operacionit. Gjithashtu, 14 persona të tjerë janë shpallur në kërkim për veprimtari të dyshuar kriminale, kryesisht të lidhura me trafikun e drogës.
Sot, gjatë seancës gjyqësore, avokatët mbrojtës kërkuan kohë për t’u njohur me aktet e hetimit, në mënyrë që të përgatisin mbrojtjen dhe qëndrimet e tyre për klientët përkatës. Për këtë arsye, gjykata vendosi shtyrjen e seancës.
Seanca e ardhshme për caktimin e masave të sigurisë ndaj të arrestuarve do të mbahet nesër, më 11 shtator 2025, në orën 09:30 në Gjykatën e Elbasanit.
