Detaje të reja janë zbardhur në lidhje me ngjarjen e rëndë kriminale brenda familjes në fshatin Kuman, Roskovec. Sipas burimeve policore, djali i çiftit Rrapaj ka deklaruar në polici se në momentin e ngjarjes ka qenë në Fier për një konsultë mjekësore, fakt i konfirmuar edhe nga verifikimi i kamerave të sigurisë.
Në dëshminë e tij, ai ka pohuar se i ati ishte tip konfliktual dhe se përplasja e fundit mes tyre kishte ndodhur rreth 10 ditë më parë. Konflikti kishte nisur për një çështje banale, pasi djali kishte hedhur pleh tek patatet në oborr, gjë që kishte acaruar 80-vjeçarin. Kjo situatë kishte përfunduar edhe në komisariatin e Roskovecit, ndërsa nëna, Dashuria, i dilte shpesh në krah bashkëshortit.
Pas kthimit nga Fieri, djali i ka gjetur prindërit pa shenja jete në banesë. Fillimisht ka njoftuar një kushëri dhe më pas policinë.
Sipas të njëjtave burime, arma e përdorur në krim dyshohet të jetë e vjetër dhe mund të ketë qenë e fshehur që prej vitit 1997, pasi është gjetur me dhe. Raportohet se arma është shkrepur dy herë, ku një plumb i ka marrë jetën gruas dhe plumbi tjetër 80-vjeçarit.
