Një shtetas turk sapo kishte çelur iftar në lokalin “Alaturka” në Sauk të Vjetër, kur tek tavolina e tij është afruar një person i armatosur. Ai e ka qëlluar me një plumb në shpatull dhe është larguar me të shpejtë.
Halil Ukcar, 39-vjeçar, është transportuar në spital për ndihmë mjekësore. Burime nga policia thanë se veprimet e autorit shfaqen të plota në kamerat e sigurisë dhe po punojnë për identifikimin e tij.
“Më datë 09.03.2026, rreth orës 19:25, është paraqitur për mjekim në spital shtetasi i huaj turk H. U, 39 vjeç, i cili dyshohet se është plagosur me armë zjarri në një lokal në Sauk. 39-vjeçari ndodhet jashtë rrezikut për jetën.
Grupi hetimor po punon për identifikimin dhe kapjen e autorit si dhe sqarimin e plotë të rrethanave të rastit“-njofton policia.
