Vetëm një javë para nisjes së Kupës së Botës 2026, polemikat rreth shitjes së biletave vazhdojnë të shtohen, ndërsa të dhënat e fundit hedhin dyshime mbi pretendimet e FIFA-s se turneu është plotësisht i shitur.
Presidenti i FIFA-s, Gianni Infantino, deklaroi në shkurt se të gjitha ndeshjet kishin shitur biletat, duke theksuar se vetëm një numër i kufizuar vendesh ruhej për shitje në minutat e fundit. Megjithatë, raportime të fundit tregojnë se realiteti është ndryshe.
Sipas BBC Sport, mijëra bileta mbeten ende të disponueshme për shumë ndeshje, veçanërisht për ato ku marrin pjesë skuadra më pak të njohura. Platforma analitike TicketData raportoi se në një moment ishin në shitje rreth 74 mijë bileta për 86 nga 104 ndeshjet e turneut.
Rënia e menjëhershme e këtij numri vetëm pak ditë më vonë ka ngritur pikëpyetje mbi funksionimin e tregut të biletave. Ndërkohë, FIFA po përballet edhe me hetime nga autoritetet amerikane për dyshime mbi mungesën e transparencës, rritjen artificiale të çmimeve dhe praktikat e mundshme mashtruese ndaj tifozëve.
Sipas raportimeve, disa tifozë kanë paguar për vende në kategori më të larta, por kanë përfunduar me ulëse me vlerë më të ulët dhe më larg fushës. Kritika ka pasur edhe për mungesën e një strukture të qartë çmimesh gjatë fazës së parë të shitjes.
FIFA ka aplikuar sistemin e njohur si “variable pricing”, ku çmimet ndryshojnë sipas kërkesës dhe fazës së shitjes. Në disa raste janë krijuar kategori të reja pranë fushës me çmime deri në 50% më të larta, të cilat nuk ishin të disponueshme në fillim të procesit.
Ndërsa ndeshjet e kombëtareve të mëdha si Argjentina, Brazili, Anglia dhe Spanja pritet të zhvillohen para stadiumeve të mbushura, sfida mbetet te takimet me skuadra më pak tërheqëse, ku shitja e biletave vazhdon të ecë me ritme më të ngadalta.
