Në dhjetor të vitit 1948, dy bashkëshorte nga Durrësi, Fejme dhe Sehadet Selfo, i dërguan një telegram Enver Hoxhës, atëherë president i Këshillit të Ministrave. Ato i kërkonin lirimin e burrave të tyre, tregtarët e njohur gjirokastrit Reiz dhe Mashar Selfo. Familja Selfo ishte e njohur në Gjirokastër për veprimtarinë tregtare, por edhe për ndihmesën që kishte dhënë në arsimimin e të rinjve të qytetit – mes tyre edhe Enver Hoxha.
Në letrën e tyre, gratë theksonin se burrat kishin shlyer deri në monedhën e fundit detyrimet financiare që shteti u kishte kërkuar, duke paguar edhe një shumë të konsiderueshme në ar, por megjithatë vazhdonin të mbaheshin padrejtësisht në burg. Lutja e tyre ishte thjesht që ligji të respektohej.
Kërkesa nuk u mor kurrë parasysh. Vetëm pak vite më vonë, në vitin 1951, pas vendosjes së bombës në ambasadën sovjetike, Reiz Selfo do të torturohej dhe më pas ekzekutohej bashkë me dhjetëra të tjerë, duke u bërë një nga viktimat e hershme të represionit komunist.
⸻
Teksti i telegramit
Gjeneral kolonel Enver Hoxha,
Presidenti i Këshillit të Ministrave, Tiranë
Tiranë – 7/12/1948
Të nënshkruarat Fejme e Sehadet Selfo kanë nderin të paraqesin lutjen si vijon:
Dy muaj më parë burrat tanë, të quajtur Reis e Mas’har Selfo, erdhën në marrëveshje me Komitetin Ekzekutiv të qytetit Tiranës dhe likuiduan pjesën e mbetur të detyrimit të tyre karshi tatimit të jashtëzakonshëm, duke paguar edhe 350 napolona ar, në bazë të kërkesës së seksionit të financës së qytetit. Procesverbali i marrëveshjes për shlyerjen e borxhit u firmos rregullisht prej palëve kontraktuese, si edhe prej inspektorit të kontrollit të qarkut Tiranës dhe këshilluar si mbas marrëveshjes burrat tanë u liruan nga burgu, duke shlyer njëherë e përgjithmonë borxhin që i detyroheshin financës, mbas një jave të lirimit të tyre, ish-ministri i Financave Ramadan Çitaku, me urdhër verbal, i porositi Komitetit Ekzekutiv të qytetit që të burgosen burrat tanë, duke shkelur marrëveshjen që u arrit me Komitetin Ekzekutiv, i cili qe autorizuar prej vetë Ramadan Çitakut që të hynte në pazarlëk me tregtarët për të likuiduar pjesën e mbetur të detyrimeve.
Për hir të së drejtës së barabartë që na siguron ligji, i drejtohemi Shkëlqesisë suaj, meqë burrat tanë mbahen në burg prej katër vjetësh, ndonëse kanë likuiduar një vit e gjysmë më parë çdo detyrim që i kishin financës. Jemi mëse të sigurt se nuk do të mungojë kujdesi i Shkëlqesisë suaj për një zgjidhje të drejtë që na takon.
Me nderime,
Fejme e Sehadet Selfo
Rruga Vaso Pasha nr. 1, Durrës
⸻
Një dëshmi e hershme e fytyrës së regjimit
Ky telegram i harruar është një dokument i rrallë që tregon fytyrën e vërtetë të regjimit komunist në vitet e para pas Luftës. Ai dëshmon sesi marrëveshjet ligjore, firmat zyrtare dhe garancitë e shtetit nuk vlente asgjë përballë një pushteti arbitrar që merrte vendime me urdhër verbal. Lutja e dy grave të thjeshta për drejtësi u ndesh me heshtjen dhe egërsinë e diktatorit, duke i kthyer bamirësit e tij të dikurshëm në viktima të dhunës së pamëshirshme politike.
