Studiuesja e njohur Enriketa Papa ka publikuar një dokukent të vitit 1982 mbi gjendjen fizike dhe mendore të Enver Hoxhës gjatë 38-vjetorit të Çlirimit. Sipas saj, dokumentet arkivore tregojnë se udhëheqësi komunist ishte plotësisht i kthjellët dhe i vetëdijshëm, në kundërshtim me hipotezat për probleme shëndetësore apo luhatje mendore.
Ai mbante nën kontroll çdo aspekt të jetës politike, nga përmbajtja e fjalimeve te organizimi i ceremonive shtetërore. Në bisedat me Simon Stefanin, Hoxha urdhëronte që të ruhej një qëndrim “politikisht korrekt” ndaj çështjes së Kosovës dhe të mos prekej ndjeshmëria e Greqisë për Vorio-Epirin. Ai theksonte se Kosova duhej të mbetej në statusin e saj autonom brenda Jugosllavisë, sipas Kushtetutës së vitit 1974.
Madje, Hoxha porosiste Ramiz Alinë dhe Foto Çanin të kontrollonin çdo fjalim publik, që të shmangeshin fraza si “Kosova është jona”.
Postimi i Enriketa Papa:
Në bisedën për 38-vjetorin e Çlirimit, në nëntor 1982, megjithëse janë hedhur hipoteza se Enver Hoxha nuk ishte mirë nga ana shëndetësore apo kishte lëkundje të shëndetit mendor, dokumentet arkivore dëshmojnë një tjetër realitet. Ai shfaqet plotësisht i kthjellët dhe i vetëdijshëm, pa asnjë shenjë devijimi nga vija e Partisë, duke mbajtur kontroll të plotë mbi çdo aspekt të jetës politike. Ai duket se vijonte të projektonte gjithçka me detaje, që nga përmbajtja e fjalimeve që do të mbaheshin në konferencën kushtuar festimeve të Pavarësisë, deri te organizimi i ceremonive në Vlorë, ku vetë nuk do të merrte pjesë, si dhe Konferenca jubilare në Tiranë.
Në një bisedë me Simon Stefanin, sekretar i KQ të PPSH, lidhur me kremtimet e 38-vjetorit të Pavarësisë, Hoxha këmbëngulte që të ruhej pozicioni “politikisht korrekt” ndaj ngjarjeve në Kosovë dhe që të mos “lëndohej” fqinji jugor me përmendjen e çështjes së Vorio-Epirit. Qëndrimi i Shqipërisë, sipas tij, duhej të ishte i qartë: mbrojtje e shtetit komunist dhe respektim i kushtetutshmërisë së Jugosllavisë, pra që Kosova të mbetej në statusin e përcaktuar nga Kushtetuta e vitit 1974 si krahinë autonome, kundër përpjekjeve të Serbisë për t’u mohuar shqiptarëve të drejtat e tyre civile.
Përsa i përket situatës së brendshme, Enveri urdhëronte që Ramiz Alia dhe Foto Çani të kontrollonin me kujdes çdo fjalim që do të mbahej në ceremonitë në Vlorë dhe Tiranë, përfshirë edhe atë të Kryeministrit Adil Çarçani “që të mos dalin gjëra që nuk duhen… si p.sh. ‘Kosova është jona’.”
