Një dokument i rrallë i vitit 1968 hedh dritë mbi përmasat e luftës së klasave në Shqipërinë komuniste. Petrit Spahiu, djali i Bedri Spahiut – një figurë e njohur e dënuar për arsye politike – i drejtohet me një letër lutjeje Mehmet Shehut, pasi i mohohet e drejta për të studiuar në universitet.
Në të njëjtën kohë, një shënim me dorë i firmosur nga Mehmet Shehu, tregon qartë vijën zyrtare të shtetit: “Duhet të mbahet e mbyllur dera e universiteteve për fëmijët e armiqve të betuar të diktaturës.”
Rasti i Petrit Spahiut është vetëm një shembull i padrejtësive që u bënë në emër të “mbrojtjes së diktaturës së proletariatit”, ku fëmijët paguanin çmimin e mëkateve politike të prindërve të tyre.
Shenim me dore i Mehmet Shehut:
Lufta e klasave vazhdon. Ne nuk duhet të pregatisim kuadro nga fëmijët e armiqve të betuar të diktaturës. Jo vetëm të mos i jepet përgjigje, por duhet interesuar që dyert e universitetit të mbahen të mbyllura për këtë kategori personash. Edhe dyert e inst. të tjera të larta.
Firma: MShehu
Elbasan më 14-VII-68
Kryetar i Këshillit të Ministrave të R.P.S.Sh.
Tiranë
Unë Petrit Spahiu i biri i Bedri Spahiut në vitin shkollor 1966-67 mbarova gjimnazin "Dhaskal Todhri" në Elbasan me nota të mira. Sikurse shokët e mi maturantë, edhe unë i bëra të gjitha dokumentat që duhen për të ndjekur studimet në Universitetin Shtetëror të Tiranës, megjithëse gjëndja ekonomike e familjes sime është shumë e vështirë.
Duke u nisur nga fakti se im atë ndodhet i burgosur për fajë politike, kam pak shpresë që autoritetet kompetente në rrethin e Elbasanit e në qendër ta marrin parasysh kërkesën time.
Për këtë arsye marr guximin t'ju drejtohem juve personalisht me lutje të dëshperume që të mos i hipet e drejta e studimeve të larta një të riu të zellshëm, i cili i ka kryer rregullisht e gjithmone të gjitha detyrat si nxënës dhe si i ri, një të riu, cili s'ka si të jetë përgjegjës për fajet e babait të tij.
Me shpresë se lutja ime do të merret parasysh, unë ju zotohem se do të vë të gjitha forcat e mija për të dalë një kuadër i aftë e i ndershëm në shërbim të Partisë e të popullit.
Me respekt të thellë
Petrit Spahiu
