Një dokument historik i rrallë është bërë publik: letra e parë e Nënë Terezës drejtuar ish-presidentit Ramiz Alia, ku ajo kërkonte leje për të hapur në Shqipëri Shtëpinë e saj të Motrave. Kjo letër dëshmon përpjekjen këmbëngulëse të shenjtores shqiptare që misioni i saj humanitar të kishte një vatër edhe në vendlindjen e saj.
Në këtë korrespondencë, Nënë Tereza shpreh përulësisht dëshirën për të sjellë ndihmën e Motrave të saj në Shqipërinë e asaj kohe, ende nën regjimin komunist, ku hapja e një shtëpie fetare ishte një akt i jashtëzakonshëm. Letra tregon se, pavarësisht pengesave ideologjike, ajo këmbënguli të sillte shërbimin e saj për më të varfërit dhe më të braktisurit.
Ky dokument i rrallë jo vetëm ka vlerë historike, por edhe nxjerr në pah kontrastin mes misionit të dashurisë dhe bamirësisë së Nënë Terezës dhe një regjimi që për dekada kishte ndaluar fenë dhe veprimtarinë fetare në vend.
