FIFA ka konfirmuar një ndryshim të rëndësishëm në ceremoninë para ndeshjeve të Kupës së Botës 2026, i cili do të prekë të gjitha kombëtaret pjesëmarrëse në turneun që do të zhvillohet në SHBA, Kanada dhe Meksikë.
Për herë të parë në historinë e Botërorit, të gjithë 26 lojtarët e grumbulluar nga një kombëtare do të jenë të pranishëm në fushë gjatë interpretimit të himnit kombëtar, jo vetëm formacioni titullar.
Sipas formatit të ri të prezantuar nga FIFA, të dyja skuadrat dhe arbitrat do të pozicionohen rreth rrethit qendror të fushës në një ceremoni të quajtur “360 gradë”. Spektakli do të shoqërohet me flamuj gjigantë kombëtarë dhe elementë të tjerë vizualë që synojnë të përfshijnë tifozët në të gjithë stadiumin.
Ndryshimi nënkupton se edhe lojtarët rezervë do të marrin pjesë aktivisht në ceremoninë e himneve, ndryshe nga praktika e deritanishme kur ata qëndronin pranë stolit.
Presidenti i FIFA-s, Gianni Infantino, deklaroi se qëllimi është krijimi i një momenti më të fortë uniteti dhe emocioni për lojtarët, tifozët dhe të gjithë pjesëmarrësit në turne.
Botërori 2026 do të jetë edicioni më i madh në histori, me 48 kombëtare dhe 104 ndeshje. Përveç formatit të ri të himneve, FIFA ka planifikuar edhe masa shtesë si pushimet për hidratim për shkak të temperaturave të larta, si dhe ceremoni të zgjeruara argëtuese para dhe gjatë kompeticionit.
Pas himneve, lojtarët do të përshëndeten me njëri-tjetrin.
