Enrique Riquelme ka konfirmuar se kandidimi i tij për president të Real Madrid nuk është thjesht simbolik, por një projekt serioz me objektivin e vetëm: Fitoren ndaj Florentino Perez.
Biznesmeni spanjoll bëri të ditur se ka investuar afro 200 milionë euro nga pasuria personale për të mbështetur fushatën e tij, duke theksuar se synon një model më profesional në drejtimin e klubit madrilen.
“Ky nuk është një projekt që varet nga një person i vetëm që merr çdo vendim. Bëhet fjalë për profesionalizim në shumë sektorë të klubit dhe për këtë arsye jam i fokusuar vetëm te fitorja”, deklaroi ai.
Riquelme shtoi se hyrja në garë i ka sjellë kosto të mëdha personale dhe profesionale, ndaj nuk do të ishte pjesë e saj vetëm për formalitet. “Nuk do të angazhoja 200 milionë euro dhe të ekspozohesha në këtë mënyrë vetëm për të marrë pjesë”, u shpreh 37-vjeçari.
Ai vuri në dukje edhe suksesin në biznes, duke treguar se drejton një kompani ndërkombëtare me rreth 5 mijë punonjës në 37 shtete, me të ardhura që arrijnë në 4 miliardë euro.
Zgjedhjet e ardhshme presidenciale te Real Madrid pritet të jenë më të fortat dhe më të rivalizuara që prej vitit 2006, ku përballë njëri-tjetrit do të jenë Riquelme dhe Perez.
