Nga Genc Sejko
Politikanë të Shqipërisë dhe Kosovës, flisni! Flisni një fjalë për Gazën dhe për atë që po ndodh atje. Mos kini frikë. Netanjahu është shumë i zënë me atë që po bën, ndërsa 303 qytetarë kanë vdekur nga uria vetëm muajt e fundit në enklavë. Thoni diçka për mijëra fëmijët e vrarë, shprehni një grimë keqardhjeje, dhe mos mbani krah politik. E dimë të gjithë se përfaqësoni shtete të vegjël, të korruptuar e pa peshë, të cilët kanë zgjedhur të jenë vasalë të përhershëm.
Bëni një reagim njerëzor për të pafajshmit që po masakrohen, për gazetarët që bien në krye të detyrës. Të paktën, bëjeni për të qenë të qetë me ndërgjegjen tuaj – nëse ju ka mbetur ende diçka e tillë.
Bëni një akt njerëzor dhe politik, qoftë edhe duke qenë në krah të Izraelit. Por kjo shurdhmëri dhe heshtje juaj po nxjerr në pah më të shëmtuarën e karakterit tuaj: pandjeshmërinë njerëzore. Për të tjerat, e dimë mirë çfarë jeni të zotë të bëni.
Shqipëria ndodhet në mes të Europës. Europianë nuk na bën vetëm firmosja e marrëveshjeve qeveritare me BE, por ndriçimi i mendjes dhe i shpirtit – trashëgimia historike e iluminizmit, që e ka veçuar kontinentin tonë nga të tjerët. Por as Europa, as besimi i shtirur në Zotin e çdo feje, nuk ju ka bërë ju, politikanë shqiptarë, të aftë të keni një grimë njerëzlliku dhe dy grima guxim politik. Sepse vasaliteti mendor dhe shoqëror është ngulur thellë në shoqërinë tonë. Dhe më primitive se njerëzit e thjeshtë janë ata që na drejtojnë – si në qeveri, ashtu edhe në opozitë.
Një turmë trushkulurish pa vlerë, që ndjekin nga pas dy dinosaurë politikë, të cilët për hir të pushtetit në qeveri dhe në opozitë, po tërheqin zvarrë një vend të tërë në imoralitet politik dhe në pandjeshmëri njerëzore. Dhe sot, kur bota e qytetëruar dhe Europa reagojnë në forma të ndryshme ndaj krimeve në Gaza – ju heshtni! Heshtja juaj është akti i fundit që dëshmon se jeni më të paaftë, më të pamoralshëm dhe më të pandjeshëm se ata që ju përdorin pa fund.
