Nga Desada Metaj
Me 113 vota pro, demokratë dhe socialistë — siç thotë edhe kënga — bashkuan votat për marrëveshjen që e çon Shqipërinë dhe Edi Ramën në Bordin e Paqes të drejtuar nga presidenti amerikan Donald Trump. Redi Muçi i Lëvizjes BASHKË abstenoi, si përfaqësuesi i të vetmes parti që mbajti një qëndrim disi ndryshe nga kori servil i politikës shqiptare për iniciativën e presidentit amerikan.
Edhe pse për disa ditë me radhë Sali Berisha, deputetë, zyrtarë dhe media pranë tij sulmuan dhe kritikuan në forma të ndryshme ftesën e drejtuar nga Trump qeverisë shqiptare, fakt mbetet që Berisha dhe Rama edhe një herë i bënë votat bashkë për ratifikimin e një marrëveshjeje “në ajër”, e cila nuk ka asnjë rresht të përcaktuar se për çfarë realisht bëhet fjalë dhe cili do të jetë roli i Shqipërisë në të.
Por çfarë rëndësie ka kjo përballë faktit që PD dhe PS duhet t’u tregojnë shqiptarëve se, në garën për të qenë sa më pranë të fortit të globit, ata janë gjithmonë shumë pranë njëri-tjetrit, duke shkelur çdo moral njerëzor dhe qytetar, për të mos përmendur atë politik.
Sali Berisha, i sanksionuar non grata nga Departamenti i Shtetit, e hodhi në kosh flamurin e sovranizmit duke përqafuar çdo deklaratë dhe qëndrim për të mbrojtur interesat e shqiptarëve “me çdo kusht”. Edhe pas poshtërimit publik që Edi Rama i bëri live në Parlament, Berisha dhe deputetët e tij nuk u stepen dhe votuan pa u menduar dy herë për një marrëveshje pa marrëveshje, vetëm për të bindur mbështetësit se janë proamerikanë.
Pa asnjë qëndrim parimor për marrëveshjen në thelb, pa një qëndrim politik për atë që përfaqëson Bordi i Paqes, pa një bosht ideologjik për qëndrimin që kanë shtetet e BE-së ndaj këtij projekti, opozita shqiptare iu bashkëngjit PS-së dhe servilizmit të saj në votimin e sotëm.
Duke shtuar edhe një tullë në murin tashmë të lartë të marrëveshjeve me mazhorancën, ku morali dhe konsistenca janë bërë si llaçi që mban ngritur barrikadën që mban larg besimin e qytetarëve se opozita shqiptare është ndryshe nga partia që prej 13 vitesh i tërheq zvarrë shqiptarët nën drejtimin e Edi Ramës.
