Gjykata Kushtetuese sot më shumë se kurrë është vënë në qendër të vëmendjes e ndoshta edhe një institucion ku politikanët kanë kthyer sytë sepse varen fatet e tyre politike. Më 2 dhjetor në Kushtetuese do të shqyrtohet në Kolegj kërkesa e Edi Ramës që lidhet me pezullimin e vendimit të GJKKO të zv.kryeministres dhe ministres së Infrastrukturës dhe Energjisë, që i ka hequr të drejtën për të ushtruar funksionet publike dhe e ka ndaluar të dalë jashtë vendit.
Një kërkesë e para e këtij lloji e që natyrisht ka vëmendje të lartë publike. Znj. Balluku akuzohet për shkelje të barazisë në tendera në dy episode dhe përballja e saj me drejtësinë do të zgjasë, porse vendimi i Gjykatës Kushtetuese është vendimtar për të.
Sali Berisha, ish-kryeministër i pandehur për dosjen Partizani, për të dytën herë troket në Kushtetuese. Në datën 17 dhjetor ai do të kërkojë heqjen e masës së detyrimit për paraqitje. Ndërsa Ilir Meta, shfuqizimin e masës së arrestit me burg. Për ish-presidentin, gjykata pret t’i dorëzohen provat deri më datë 9 dhjetor e më pas do të nxjerrë datën për shqyrtim.
Politikani i radhës është kryebashkiaku i Tiranës, Erion Veliaj. Ai shpreson po ashtu lirinë në Gjykatën e Lartë. Kërkesa e tij u regjistrua javën që lamë pas dhe pritet të dorëzohen provat e palëve. Në gjasë, Veliaj do ta mësojë fatin e tij në muajt e parë të 2026-s. Deri atëherë do të ketë mbushur plot 1 vit në qeli.
Nisur nga këto çështje, Kushtetuesja është në vëmendjen e të gjithëve dhe përpara një testi që vulos fatin e reformës në drejtësi. Si rrallëherë, Gjykata Kushtetuese është në provën e politikës së të gjithë krahëve dhe ngjyrave. Më herët ajo është anatemuar nga Sali Berisha dhe segmente të caktuara të së majtës dhe të së djathtës, por deri diku ia ka dalë t’i imponohet me qëndrimet dhe vendimet e saj politikës shqiptare. E mangët me një anëtar por fuqiplotë për të marrë vendimet e duhura, Gjykata Kushtetuese e tejkaloi pak ditë më parë edhe sfidën e imponimit nga segmente të mazhorancës për t’i imponuar Naureda Llagamin si anëtare të saj.
Tashmë trupa e saj ka vetëm një sfidë të madhe për të tejkaluar: atë të kapërcimit të emocioneve politike për të parë dhe gjykuar thjesht mbi Kushtetutën dhe germat e saj të ftohta dhe të qarta. Dhe kjo nuk është as e thjeshtë, por as e pakapërcyeshme. Është thjesht sfida me të cilën ndeshen çdo ditë mijëra shqiptarë që duhet të zgjedhin mes së mirës dhe të keqes.
