Sali Berisha ka mbledhur sot kryesinë e PD-së, 4 muaj pas rezultatit katastrofik të zgjedhjeve parlamentare të 11 majit. Gjatë gjithë kësaj kohe, kryetari i PD-së ka dalë i vetëm thuajse çdo ditë në konferencë për shtyp, duke denoncuar “farsën zgjedhore” dhe duke paralajmëruar veprime e akte në shtator. Por me ardhjen e vjeshtës, duket se u ul edhe nxehtësia e veprimit opozitar.
Pas 4 muajsh, anëtarët e kryesisë së PD-së kanë dëgjuar në mënyrë të përmbledhur të gjitha detajet e farsës elektorale, mosnjohjen e rezultatit dhe, bashkë me to, kanë marrë porosinë e Berishës për t’u bërë gati për seancën e parë të parlamentit. Të mos njohësh një proces zgjedhor si ai i 11 majit duket si një aksion normal, edhe pse është refren i njohur për PD-në. Por pas kësaj, të bëhesh gati të hysh në parlament ngre një pikëpyetje të madhe: nëse nuk njeh procesin, si ka mundësi që i bindesh rezultatit të dalë prej tij dhe bëhesh pjesë integrale e “farsës elektorale”?
Opozitarizmi brenda parlamentit të dalë nga zgjedhjet e 11 majit është një akt normal politik për opozitën, por jo akt politik kur për 4 muaj deklaron se nuk i njeh këto zgjedhje. Në mbledhje, Berisha pyeti: “Kush ka për të thënë ndonjë gjë?” Pasuan 3 minuta heshtje, e më tej ai vetë shpalli vendimin. Produktet e listës së mbyllur, sigurisht, nuk mund të kenë sy e vesh për të parë e gojë për të kundërshtuar kryetarin e partisë. Por mirë është të gjejnë një arsye të fortë për të justifikuar të pajustifikueshmen: nuk njohim rezultatin e zgjedhjeve, por do të shkojmë në parlament.
