Akti i puthjes në ballë të të akuzuarit Veliaj nga aktori i mirënjohur për realizimin e shumë roleve në përputhje me kriteret e artit socialist, Robert Ndrenika, shkaktoi një reagim të gjerë publik e mediatik. Si Helena Kadare, ashtu dhe Robert Ndrenika, kanë prishur rehatinë e moshës së thyer për të shkuar dyerve e sallave të gjykatave për të akuzuarin, Erjonin e Bashkisë së Tiranës.
Ajo çka shkaktoi edhe më shumë pështjellim ishte gatishmëria, teatrale shpresojmë dhe jo reale, e Ndrenikës për të vijuar burgun e mbetur të Veliajt, pavarësisht se pohoi që nuk i kuptonte akuzat për Veliajn. Më shkurt, Ndrenika ofroi të ishte bedeli i Veliajt.
Pamë një tufë individësh – artistë, gazetarë etj – tek bënin homazh para të akuzuarit Veliaj, deri dhe aktin e dorëputhjes, pikërisht të asaj dore që ka firmosur, siç duket, projekte e financime me paratë e taksapaguesve.
Më herët kemi parë edhe klerikë të fjalimosen në ditët e shenjta për paraburgimet e burgimet, ndërsa Gjykata e Lartë ishte vënë në lëvizje për “ta sqaruar njëherë e mirë se si e qysh burgoset njeriu”.
Edhe më herët, në rastin Saimir Tahiri apo në rastin Belinda Balluku, kemi parë rreshtime militantësh e duartrokitje pafund kur këtyre personave u komunikoheshin akuzat apo marrja nën hetim.
Me mitingje duartrokitëse, që me raste krijuan deri mjedis kërcënimi për sigurinë e organeve të posaçme të hetimit, përcillej Veliaj apo paraqitej Berisha.
Humbja e fuqisë për të qenë arrogant rëndon shumë. Prandaj krijojnë dhe skena e skenarë të tillë “dashurish” nga populli militant për figurat partiake, apo me profil artist nga figura si Veliaj.
Por shëmtimi më i madh ndodhi në sallën e gjykatës, të premten më 8 maj. Një vetofrim për rolin e bedelit burgaxhi dhe një puthadore, të asaj dore që votoi e nënshkroi shembjen e ndërtesës së Teatrit Kombëtar, na tregoi se sa thellë ka shkuar bjerrja e integritetit dhe dinjitetit në këtë vend, pikërisht nga drejtues shteti e institucionesh që kanë profilin Veliaj, Tahiri, Balluku, Rama, Meta e Berisha.
Prej sot, nuk është çudi që në këtë vend të ofrohet edhe shërbimi i bedelit burgaxhi, për tufën e të korruptuarve që i bie lapsi të shfaqen në dyer prokurorish e gjykatash.
Rol të bukur luajti aktori Ndrenika. Me sa duket, karriera e tij artistike do të vuloset e mbahet mend më tej për rolin më të arrirë të jetës së tij, atë të shfaqjes pa doreza të vetvetes, të bedelit në tentativë.
