Zyrtarë të lartë të mbrojtjes dhe inteligjencës nga Izraeli dhe Arabia Saudite janë në Uashington këtë javë si të ftuar të qeverisë amerikane për bisedime mbi Iranin.
Sipas Axios, i cili citon dy zyrtarë amerikanë dhe dy burime të tjera me njohuri për zhvillimet, Donald Trump po shqyrton mundësinë e sulmeve ushtarake. Trump ka urdhëruar një përforcim të pranisë ushtarake amerikane në Gjirin Persik, në mënyrë që të jetë gati për veprime të mundshme ushtarake.
Izraeli, Arabia Saudite dhe vende të tjera në rajon kanë qenë në gatishmëri të lartë për ditë të tëra, duke parashikuar një sulm të mundshëm amerikan.
Zyrtarët e Shtëpisë së Bardhë thonë se Donald Trump ende nuk ka marrë një vendim përfundimtar. Të mërkurën, ai e kërcënoi përsëri Iranin me sulme që “do të jenë shumë më të këqija” se ato të mëparshmet. Por bashkëpunëtorët e tij thonë se ai është ende i gatshëm të eksplorojë rrugën diplomatike.
Izraelitët udhëtuan për në Uashington për të ndarë informacion në lidhje me objektivat e mundshëm brenda Iranit.
Kreu i inteligjencës ushtarake të Izraelit, gjenerali Shlomi Binder, u takua të martën dhe të mërkurën me zyrtarë të lartë në Pentagon, CIA dhe Shtëpinë e Bardhë, sipas dy zyrtarëve amerikanë.
Një burim i njohur me diskutimet tha se Binder udhëtoi për në Uashington për të informuar administratën Trump mbi informacionin specifik në lidhje me Iranin që SHBA-të kishin kërkuar.
