Partia në pushtet e Japonisë, e udhëhequr nga kryeministrja Sanae Takaichi, ka shënuar fitore në zgjedhjet e parakohshme të mbajtura të dielën. Sipas raportimeve të mediave lokale, Partia Liberale Demokratike (LDP), në bashkëpunim me aleatin e saj, Partinë Ishin, ka siguruar më shumë se dy të tretat e vendeve në Dhomën e Ulët të parlamentit, konkretisht 328 nga gjithsej 465 mandate.
Kjo shumicë e zgjeruar i mundëson LDP-së të anashkalojë Dhomën e Lartë, ku aktualisht nuk gëzon shumicën parlamentare.
Kryeministrja e parë grua e Japonisë vendosi të shpallë zgjedhje të parakohshme për të rinovuar mandatin e saj, vetëm katër muaj pasi mori drejtimin e LDP-së. Ajo ishte zotuar se do të jepte dorëheqjen nëse partia e saj nuk do të arrinte të siguronte shumicën, duke e bërë këtë proces zgjedhor një hap të rrezikshëm politik.
Popullariteti personal i Takaichi-t ka luajtur një rol kyç në këtë fitore, pasi vlerësimet për miratimin e qeverisë së saj mbeten mbi 70 për qind. Ky rezultat përbën një kontrast të fortë me dy paraardhësit e saj, gjatë mandateve të të cilëve LDP humbi shumicën parlamentare për shkak të skandaleve të korrupsionit dhe rritjes së shpenzimeve.
Kujtojmë se në vitin 2024, LDP humbi shumicën në të dy dhomat e parlamentit, ndërsa aleanca e saj dhjetëvjeçare me partinë Komeito u shpërbë.
