Presidenti i Ukrainës, Volodymyr Zelenskyy, do të zhvillojë sot një takim vendimtar në Shtëpinë e Bardhë me homologun e tij amerikan, Donald Trump. Vizita vjen në një moment kritik për të ardhmen e luftës në Ukrainë, vetëm pak ditë pas takimit mes Trump dhe presidentit rus, Vladimir Putin, në Alaskë – ku u diskutua për një marrëveshje të mundshme paqeje.
Takimi i sotëm pritet të jetë me shumë peshë politike dhe diplomatike. Për të shmangur përsëritjen e përplasjes së fundit me Trump – i cili dikur e kritikoi publikisht që nga veshja e deri te kërkesat për ndihmë ushtarake – Zelenskyy këtë herë nuk është i vetëm. Ai shoqërohet nga një grup udhëheqësish të lartë evropianë, që synojnë të shmangin çdo marrëveshje që do të kërkonte lëshime territoriale nga Kievi.
Sipas axhendës së publikuar, takimi zyrtar nis në orën 13:15 me orën lokale (19:15 me orën shqiptare), ndërsa në orën 21:00 do të mbahet takimi i përbashkët me liderët evropianë. Ende nuk ka një kohëzgjatje të përcaktuar për këtë takim.
Pak orë para takimit, Trump publikoi një mesazh në rrjetin e tij Truth Social, ku deklaroi se Zelenskyy “mund ta përfundojë menjëherë luftën nëse dëshiron”, duke përjashtuar mundësinë që Ukraina të rikthejë Krimenë apo të anëtarësohet në NATO. “Nuk ka asnjë mënyrë për të rimarrë Krimenë e dhënë nga Obama… Disa gjëra nuk ndryshojnë kurrë,” shkruan Trump në postimin e tij.
Takimi pritet të jetë vendimtar për ecurinë e negociatave të paqes dhe për pozicionin ndërkombëtar të Ukrainës në muajt në vijim.
