Biografi i Donald Trump, Michael Wolff, ka dhënë një shpjegim për ndryshimin e qëndrimit të presidentit amerikan ndaj kërcënimeve publike për blerjen e Groenlandës, duke i cilësuar ato si pjesë të një strategjie komunikimi dhe jo si plane reale politike.
Duke folur në podkastin Inside Trump’s Head, Wolff tha se deklaratat e Trump për një pushtim ushtarak të Groenlandës apo për vendosjen e tarifave ndaj disa vendeve evropiane që kundërshtuan idenë, nuk kishin kurrë përmbajtje thelbësore. Sipas tij, qëllimi kryesor ishte krijimi i zhurmës mediatike dhe mbajtja e vëmendjes globale të fokusuar te Trump.
“Ne ishim ndër të paktët që thamë që në fillim se kjo nuk do të thotë asgjë. Ai nuk do ta marrë Groenlandën. Ai nuk do t’i zbatojë këto tarifa. Kjo nuk ka asnjë kuptim”, u shpreh Wolff gjatë bisedës me bashkë-prezantuesen Joanna Coles.
Autori e përshkroi çështjen si një tjetër “kapitull i Trump”, i destinuar të mbyllej shpejt, duke theksuar se presidenti e shfrytëzon sa më shumë të mundet një temë për të qëndruar “në qendër të botës edhe një ditë tjetër”.
Sipas Wolff, mbulimi i gjerë mediatik i idesë për Groenlandën i shërbeu Trump-it për të larguar vëmendjen nga problematika të tjera të ndjeshme, si dosjet Epstein, ekonomia amerikane dhe imigracioni – fusha ku, sipas tij, sondazhet e nxjerrin Trump-in në disavantazh.
“Ai vë zjarre dhe kënaqet duke parë zjarrfikësit duke punuar”, tha Wolff, duke cituar një bashkëpunëtor të afërt të Trump. Sipas këtij interpretimi, Trump krijon kriza me intensitet të lartë, por pa pasur kurrë synim t’i çojë deri në fund.
Deklaratat e Wolff shkaktuan reagim të ashpër nga Shtëpia e Bardhë. Drejtori i Komunikimit, Stephen Cheung, e cilësoi autorin si “gënjeshtar dhe mashtrues të provuar”, duke pretenduar se ai shpik histori nga imagjinata e tij.
Në një deklaratë tjetër, Shtëpia e Bardhë theksoi se administrata amerikane mbetet optimiste për arritjen e objektivave strategjike lidhur me Groenlandën, duke nënvizuar se një marrëveshje e mundshme do t’i shërbente interesave afatgjata të Shteteve të Bashkuara “me shumë pak kosto”.
