Nga sot në orën 18:30, në mbi 80 qytete dhe komuna të Serbisë janë thirrur tubime të organizuara nga Partia Progresive Serbe (SNS) në pushtet, të cilat prezantohen si nisma të “qytetarëve që kundërshtojnë bllokadat”. Përmes rrjeteve sociale dhe mediave pranë qeverisë, është bërë thirrje masive për pjesëmarrje, duke tentuar të krijohet përshtypja e një reagimi spontan ndaj muajve të protestave të opozitës.
Mediat proqeveritare si Politika dhe Informer raportojnë për mobilizim në pothuajse çdo komunë, duke e paraqitur këtë si përgjigje ndaj protestave që prej muajsh kanë denoncuar korrupsionin, autoritarizmin dhe abuzimet e pushtetit. Ndërkohë, portali 021 thekson se tubimet janë mbajtur në të gjitha qeveritë lokale të Vojvodinës, përveç Novi Sadit, duke kujtuar se edhe ngjarjet e mëparshme, më 20 gusht, u organizuan nga një OJQ e lidhur ngushtë me qeverinë.
Presidenti Aleksandar Vuçiç ka deklaruar se tubimet nuk janë kundër protestave, por kundër bllokadave, duke shmangur çdo përgjegjësi mbi krizën politike që, sipas analistëve, është shkaktuar nga vetë qeveria. Ministri i Brendshëm Ivica Daçiç raportoi për rreth 33 mijë pjesëmarrës, por shifrat e policisë janë kritikuar si të manipuluara për të përforcuar imazhin e SNS.
Analistët vendas e shohin këtë mobilizim si një tentativë të pushtetit për të zbehur ndikimin e protestave autentike qytetare, të cilat prej muajsh po kërkojnë transparencë, demokraci dhe llogaridhënie. Sipas tyre, mobilizimi masiv i kontrolluar nga qeveria synon të përplasë një “protestë të fabrikuar” me atë të vërtetën, duke thelluar ndasitë politike në vend.
