Një video e publikuar së fundmi shton dyshimet se një raketë amerikane mund të ketë goditur një shkollë fillore në Iran, ku sipas raportimeve u vranë 175 persona, shumë prej tyre fëmijë.
Videoja, e publikuar të dielën nga agjencia gjysmëzyrtare iraniane Mehr News Agency dhe e verifikuar nga The New York Times, tregon një raketë lundruese Tomahawk që godet një bazë detare pranë shkollës në qytetin Minab më 28 shkurt. Forca e vetme e përfshirë në konflikt që përdor raketa Tomahawk është ushtria amerikane.
Sipas një analize të The New York Times, që përfshin imazhe satelitore, video të verifikuara dhe postime në rrjetet sociale, ndërtesa e shkollës fillore Shajarah Tayyebeh është dëmtuar rëndë nga një goditje precize që ndodhi në të njëjtën kohë me sulmet ndaj bazës detare të Gardës Revolucionare Islamike.
Kur u pyet nga një gazetar i The New York Times nëse SHBA kishte bombarduar shkollën, presidenti Donald Trump e mohoi përgjegjësinë.
“Jo. Sipas mendimit tim dhe bazuar në atë që kam parë, këtë e ka bërë Irani,” tha Trump, duke shtuar se municionet iraniane janë “shumë të pasakta”.
Edhe sekretari amerikan i Mbrojtjes, Pete Hegseth, deklaroi se Pentagoni po heton incidentin, por shtoi se “pala e vetme që shënjestron civilët është Irani”.
Analiza e videos tregon një raketë që godet një ndërtesë të përshkruar si klinikë mjekësore brenda bazës së Gardës Revolucionare. Pas goditjes, nga ndërtesa dalin re të mëdha tymi dhe mbetjesh, ndërsa në sfond dëgjohen britmat e njerëzve.
Kur kamera kthehet drejt shkollës, shihen re të mëdha pluhuri dhe tymi që tashmë ngrihen nga zona e saj, duke sugjeruar se shkolla ishte goditur pak para sulmit mbi bazën detare.
Ekspertë të armëve dhe analistë të organizatës Bellingcat kanë identifikuar raketën në video si Tomahawk, një armë që nuk përdoret as nga Izraeli dhe as nga Irani. Dhjetëra raketa të tilla janë lëshuar nga anijet e Marinës amerikane drejt Iranit që nga fillimi i sulmeve më 28 shkurt.
Raketat Tomahawk, sipas Departamentit amerikan të Mbrojtjes, janë raketa të drejtuara me rreze të gjatë dhe saktësi të lartë që mund të fluturojnë deri në rreth 1,600 kilometra. Ato programohen me një plan të saktë fluturimi përpara lëshimit dhe drejtohen vetë drejt objektivit.
Megjithatë, përcaktimi i saktë i asaj që ndodhi është vështirësuar nga mungesa e fragmenteve të dukshme të armëve dhe nga fakti që gazetarët e pavarur nuk kanë mundur të arrijnë në vendin e ngjarjes.
