Presidentja e përkohshme e Venezuelës, Delcy Rodríguez, ka shpallur një ligj të gjerë amnistie që synon lirimin e qindra të burgosurve politikë, në një përpjekje për të nxitur pajtimin kombëtar dhe për të ulur tensionet politike në vend.
Mes të liruarve ka pasur edhe shtetas shqiptarë, i identifikuar me inicialet J.N., i cili ishte arrestuar me akuza për përfshirje në një komplot të dyshuar ndaj ish-presidentit Nicolás Maduro. Ai aktualisht ndodhet nën kujdesin e Kryqit të Kuq, në pritje të lejes për t’u kthyer në Shqipëri.
Nisma mbulon çështje që nga viti 1999, por përjashton krime të rënda si vrasja, trafiku i drogës dhe korrupsioni. Autoritetet raportojnë se qindra persona janë liruar tashmë, ndërsa organizatat e të drejtave të njeriut thonë se shumë të tjerë mbeten ende pas hekurave.
Në të njëjtën kohë, qeveria njoftoi edhe mbylljen e burgut famëkeq El Helicoide, i njohur për akuzat për abuzime ndaj të burgosurve, i cili pritet të shndërrohet në një qendër sociale dhe sportive.
Ky vendim vjen pas ndryshimeve të fundit politike në Venezuelë dhe shihet si një hap drejt normalizimit të situatës, edhe pse kritikët kërkojnë më shumë transparencë dhe drejtësi në procesin e lirimeve.
