Presidenti i Ukrainës, Volodymyr Zelensky, ka konfirmuar se vendi i tij i ka dorëzuar të gjitha kërkesat zyrtare për transferime armësh Presidentit të Shteteve të Bashkuara të Amerikës, Donald Trump, si pjesë e një marrëveshjeje të gjerë dypalëshe me vlerë prej 90 miliardë dollarësh.
“Në lidhje me atë që Ukraina kërkon nga SHBA-të – ne i kemi dorëzuar të gjitha këto Presidentit të Shteteve të Bashkuara të Amerikës. Me detaje dhe ilustrime të qarta të asaj që nevojitet. E gjithë kjo është parashikuar në marrëveshjen tonë të madhe prej 90 miliardë dollarësh,” deklaroi Zelensky gjatë një konference për shtyp në Kiev.
Sipas Presidentit ukrainas, lista e kërkesave përfshin armë të sofistikuara, sisteme mbrojtëse dhe pajisje të tjera ushtarake, ndërsa dokumentacioni i paraqitur përmban “detaje të plota dhe ilustrime të qarta” mbi nevojat e ushtrisë ukrainase.
Zelensky shtoi gjithashtu se Ukraina është e hapur për të negociuar marrëveshje të veçanta, që përfshijnë kategori të ndryshme armësh, përfshirë edhe ato më të avancuara.
“Ne jemi të gatshëm për marrëveshje të veçanta për lloje të ndryshme armësh, duke përfshirë edhe ato me rreze të gjatë veprimi,” theksoi ai.
Kjo marrëveshje vjen në një moment kyç për sigurinë rajonale dhe partneritetin strategjik mes Kievit dhe Uashingtonit, ndërsa Ukraina vijon të përballet me agresionin rus dhe përpiqet të forcojë kapacitetet e saj mbrojtëse.
Për momentin, Shtëpia e Bardhë nuk ka dhënë një koment zyrtar mbi kërkesat e dorëzuara nga Ukraina apo përmbajtjen e marrëveshjes së re.
