Presidenti amerikan Donald Trump deklaroi se një forcë e fuqishme detare e SHBA-së është tashmë në lëvizje drejt rajonit, duke rritur presionin e Uashingtonit ndaj regjimit iranian.
“Në këtë moment kemi një armadë të madhe, një flotilje, quajeni si të doni, që po shkon drejt Iranit, madje më e madhe se ajo që kishim gjatë krizës në Venezuelë”, u shpreh Trump në deklarata për mediat të premten. Sipas tij, kjo lëvizje është më e madhe si në përmasa ashtu edhe në kapacitete krahasuar me mobilizimin e mëparshëm në Venezuelë.
Trump theksoi se zhvillimet e mëtejshme do të varen nga qëndrimi i Teheranit në negociata. “Nëse arrijmë një marrëveshje me Iranin, kjo do të jetë pozitive… nëse jo, do të shohim çfarë do të ndodhë”, deklaroi ai.
“Po planifikoj bisedime të reja me Iranin”
Të enjten në mbrëmje, presidenti amerikan përsëriti se shpreson të mos jetë e nevojshme të urdhërojë sulme ushtarake ndaj Iranit, pa e përjashtuar plotësisht këtë mundësi. Ai bëri të ditur gjithashtu se kanalet e komunikimit me Teheranin mbeten të hapura.
Duke iu përgjigjur një pyetjeje nëse ka pasur bisedime me Iranin ditët e fundit ose nëse planifikon të ketë të tilla, Trump tha: “I kam pasur dhe i planifikoj”.
“Ne jemi të fortë ekonomikisht dhe ushtarakisht (…) dhe tani kemi një forcë ajro-detarë që po shkon drejt një vendi të quajtur Iran. Shpresoj që të mos kemi nevojë ta përdorim këtë forcë”, shtoi ai.
Trump ka paralajmëruar në mënyrë të përsëritur Iranin se “koha po mbaron”, duke theksuar se çdo sulm i mundshëm i SHBA-së do të ishte i ashpër dhe shumë i gjerë.
Irani: Gati për bisedime “të drejta” me SHBA-në
Nga ana tjetër, ministri i Jashtëm iranian deklaroi se Irani është i gatshëm të rifillojë bisedimet me Shtetet e Bashkuara, me kusht që ato të jenë të drejta dhe të mos përfshijnë kapacitetet mbrojtëse të vendit.
“Nëse negociatat janë të drejta, Irani është i gatshëm të marrë pjesë”, tha Abbas Araghtchi gjatë një konference për shtyp në Stamboll, pas takimit me homologun e tij turk.
Armata amerikane në Lindjen e Mesme
Sipas një zyrtari amerikan që foli për CNN, armada detare e SHBA-së me në krye aeroplanmbajtësen USS Abraham Lincoln ka hyrë në zonën e përgjegjësisë së Komandës Qendrore, që përfshin Lindjen e Mesme dhe Iranin.
Grupi i goditjes përfshin aeroplanmbajtësen Lincoln dhe tre destrojerë me raketa të drejtuara: USS Frank E. Petersen Jr., USS Spruance dhe USS Michael Murphy. Në bord ndodhen avionë luftarakë F/A-18E/F Super Hornet, avionë të luftës elektronike EA-18G Growler, avionë F-35C dhe helikopterë MH-60R/S.
Sipas CBS, deri të hënën në mëngjes forca detare nuk ndodhej ende në pozicion të plotë operacional, çka nënkupton se nuk kishte arritur në vendndodhjen e saj përfundimtare.
