Administrata e presidentit amerikan Donald Trump ka njoftuar tërheqjen nga detyra të 30 diplomatëve karriere që mbanin poste ambasadorësh ose funksione të tjera të larta në përfaqësitë diplomatike të Shteteve të Bashkuara.
Sipas burimeve zyrtare, vendimi synon riformësimin e përfaqësimit diplomatik amerikan jashtë vendit, me fokus vendosjen e personelit që mbështet politikat dhe axhendën e presidentit Trump. Shefat e misioneve diplomatike në të paktën 29 vende janë informuar se mandatet e tyre do të përfundojnë në muajin janar. Të gjithë diplomatët e prekur ishin emëruar gjatë administratës Biden, por kishin mbetur në detyrë edhe pas ndryshimeve të para të ndërmarra në muajt e parë të mandatit të dytë të Trump.
Në Ballkanin Perëndimor, ndryshimet prekin Maqedoninë e Veriut dhe Malin e Zi. Lëvizje të ngjashme janë regjistruar edhe në Sllovaki, si dhe në disa vende të tjera në kontinente të ndryshme.
Afrika rezulton të jetë rajoni më i prekur nga ky riorganizim, me ambasadorë të larguar në 13 vende, e ndjekur nga Azia me gjashtë vende. Po ashtu, janë prekur edhe Armenia, Algjeria, Egjipti, Nepali, Sri Lanka, Guatemala dhe Surinami.
Autoritetet amerikane sqarojnë se diplomatët e tërhequr nuk humbasin statusin e tyre në shërbimin e jashtëm, por do të kthehen në Uashington për detyra të tjera, nëse zgjedhin t’i pranojnë ato.
Departamenti i Shtetit i ka mbrojtur këto ndryshime, duke i cilësuar si një proces standard që ndodh në çdo administratë të re. Sipas DASH, ambasadorët shërbejnë sipas dëshirës së presidentit dhe janë përfaqësues të drejtpërdrejtë të tij, ndaj kreu i Shtëpisë së Bardhë ka të drejtën të sigurojë që ata të çojnë përpara axhendën politike “Amerika e Para”.
