Presidenti amerikan Donald Trump mbajti një fjalim të gjatë në Asamblenë e Përgjithshme të OKB-së, ku u ndal tek arritjet që, sipas tij, kanë shënuar mandatin e dytë presidencial. Ai e nisi fjalën duke sulmuar administratën pararendëse, të cilën e akuzoi për një “sërë katastrofash”, ndërsa deklaroi se tetë muaj nga nisja e mandatit të dytë, SHBA është “vendi më i nxehtë në botë”. “Kjo është epoka e artë e Amerikës,” u shpreh Trump.
Në qendër të fjalimit, ai pretendoi se ka ndërmjetësuar fundin e shtatë luftërave që konsideroheshin të “papërfundueshme”: konfliktet mes Kamboxhias dhe Tajlandës; Kosovës dhe Serbisë; Pakistanit dhe Indisë; Izraelit dhe Iranit; Egjiptit dhe Etiopisë; Armenisë dhe Azerbajxhanit; si dhe luftën e ashpër mes Republikës Demokratike të Kongos dhe Ruandës. “Asnjë president tjetër nuk ka bërë asgjë që t’i afrohet kësaj. OKB-ja as që u përpoq të ndihmonte,” theksoi Trump.
Më tej, ai foli për marrëveshjet tregtare që i cilësoi “historike”, të cilat erdhën pas tarifave të reja globale të vendosura nga administrata e tij. Trump përmendi Mbretërinë e Bashkuar si vendin e parë që nënshkroi një marrëveshje të madhe tregtare me SHBA, duke shtuar se më pas u bashkuan edhe Bashkimi Europian, Japonia, Koreja e Jugut, Vietnami dhe “shumë të tjerë”. “Amerika po respektohet përsëri, si kurrë më parë,” u shpreh ai.
Kreu i Shtëpisë së Bardhë kujtoi se aleatët e NATO-s kanë pranuar kërkesën e tij për të rritur shpenzimet e mbrojtjes nga 2% në 5% të PBB-së. Ai theksoi gjithashtu përpjekjet për të forcuar partneritetet në Gjirin Persik me Arabinë Saudite, Katarin dhe Emiratet e Bashkuara Arabe.
Në vijim, Trump përmendi performancën e tregjeve amerikane, nivelet rekord të investimeve, shkurtimet fiskale e rregullatore, si dhe politikat e ashpra të sigurisë kufitare. Të gjitha këto, sipas tij, tregojnë se administrata e tij po udhëheq një Amerikë më të fortë dhe më të respektuar në botë.
