Presidenti i Shteteve të Bashkuara, Donald Trump, deklaroi se SHBA ka “fituar” në Iran, ndërsa theksoi se negociatat diplomatike mes dy vendeve për t’i dhënë fund luftës janë ende në zhvillim.
Në një deklaratë për gazetarët, Trump tha se Irani ka rënë dakord me kërkesën kryesore të Uashingtonit, që sipas tij është që Teherani të mos zotërojë kurrë armë bërthamore.
Ai theksoi se bisedimet mes palëve po vazhdojnë dhe se beson që objektivi kryesor është arritur, megjithëse pranoi se nuk mund të japë një garanci të plotë për përfundimin e luftës. “Mendoj se do ta përfundojmë, por nuk mund t’ju them me siguri”, u shpreh ai.
Trump shtoi gjithashtu se një tjetër objektiv i SHBA-së, ndryshimi i regjimit në Iran, sipas tij tashmë ka ndodhur. Ai argumentoi se drejtuesit kryesorë të vendit nuk janë më në kontroll dhe se edhe niveli i tretë i udhëheqjes është eliminuar, gjë që, sipas presidentit amerikan, tregon se objektivat e Uashingtonit janë arritur.
Më herët, Trump deklaroi se negociatat me Iranin për t’i dhënë fund konfliktit janë duke u zhvilluar “pikërisht tani”, duke pretenduar se Teherani dëshiron me çdo kusht të arrijë një marrëveshje.
Ai tha se në këto bisedime janë të përfshirë nënpresidenti JD Vance, sekretari i Shtetit Marco Rubio, i dërguari special Steve Witkoff, si dhe dhëndri i tij Jared Kushner.
