Presidenti i Shteteve të Bashkuara, Donald Trump, ka njoftuar një ndryshim të planit të vaksinimit të fëmijëve në SHBA, duke deklaruar se numri i injeksioneve të rekomanduara do të reduktohet nga 72 në 11.
Në një postim në rrjetin e tij social Truth, Trump bëri të ditur se administrata e tij ka miratuar një plan të përditësuar të vaksinimit të fëmijërisë, të cilin e cilëson si të bazuar në “standardet më të larta shkencore” dhe të harmonizuar me praktikat e vendeve të tjera të zhvilluara.
Sipas Trump, plani i ri parashikon vaksinim vetëm kundër 11 sëmundjeve më serioze dhe të rrezikshme, ndërsa prindërit do të kenë ende mundësinë të zgjedhin vaksinimin e plotë për fëmijët e tyre, i cili do të vijojë të mbulohet nga sigurimet shëndetësore.
Ai thekson se qëllimi i këtij ndryshimi është unifikimi i politikave të vaksinimit të SHBA-së me ato të vendeve të tjera të zhvilluara në botë.
“Sot, Administrata Trump është krenare të njoftojë planin e përditësuar të Vaksinimit të Fëmijërisë të Shteteve të Bashkuara të Amerikës. Ky plan është i rrënjosur në Standardin e Artë të Shkencës dhe është pranuar gjerësisht nga Shkencëtarët dhe Ekspertët në të gjithë botën. Duke filluar nga sot, Amerika nuk do të ketë më nevojë për 72 “injeksione” për fëmijët tanë të bukur dhe të shëndetshëm. Po kalojmë në një plan shumë më të arsyeshëm, ku të gjithë fëmijëve do t’u rekomandohet të marrin Vaksinime vetëm për 11 nga sëmundjet më serioze dhe të rrezikshme. Prindërit ende mund të zgjedhin t’u japin fëmijëve të tyre të gjitha Vaksinimet, nëse dëshirojnë, dhe ata do të jenë ende të mbuluar nga sigurimi. Megjithatë, ky plan i përditësuar më në fund i harmonizon Shtetet e Bashkuara me vendet e tjera të zhvilluara në të gjithë botën”, shkruan Trump.
