Presidenti amerikan Donald Trump deklaroi se Shtetet e Bashkuara planifikojnë të ndërpresin të gjitha marrëdhëniet tregtare me Spanjën, pasi kjo e fundit refuzoi të lejojë përdorimin e bazave të saj ushtarake për misione të lidhura me goditjet ndaj Iranit.
Gjatë një takimi me kancelarin gjerman Friedrich Merz, Trump u shpreh se Spanja ka mbajtur një qëndrim “të papranueshëm” ndaj kërkesave të SHBA-së.
“Spanja ka qenë e tmerrshme,” u tha Trump gazetarëve, duke shtuar se i ka kërkuar Sekretarit të Thesarit, Scott Bessent, të “ndërpresë të gjitha marrëdhëniet” me Madridin.
“Do të ndërpresim të gjithë tregtinë me Spanjën. Nuk duam të kemi asgjë të bëjmë me Spanjën,” deklaroi ai.
Presidenti amerikan kritikoi gjithashtu edhe Mbretërinë e Bashkuar për vendime të ngjashme lidhur me përdorimin e bazave ushtarake në operacionet që lidhen me Iranin.
