Donald Trump paralajmëroi Iranin me pasoja të rënda nëse ndërpritet transporti detar i naftës në Ngushticën e Hormuzit, një nga rrugët më të rëndësishme të tregtisë globale të energjisë. Në një reagim të fortë të publikuar në platformën e tij Truth Social, presidenti amerikan tha se çdo përpjekje e Iranit për të bllokuar kalimin e naftës do të përballet me një përgjigje shumë më të ashpër nga Shtetet e Bashkuara.
“Nëse Irani bën diçka që ndalon rrjedhën e naftës brenda Ngushticës së Hormuzit, ai do të goditet nga Shtetet e Bashkuara të Amerikës NJËZET HERË MË FORT sesa është goditur deri më tani”, shkroi Trump në postimin e tij.
Ngushtica strategjike është një pikë kyçe për tregtinë globale të energjisë, pasi rreth 20% e naftës botërore kalon përmes saj. Tensionet dhe luftimet në rajon kanë ulur ndjeshëm trafikun detar dhe kanë shkaktuar rritje të çmimeve të naftës në tregjet ndërkombëtare.
Në deklaratën e tij, Trump përdori gjithashtu një gjuhë shumë të ashpër, duke paralajmëruar për pasoja shkatërruese në rast përshkallëzimi të mëtejshëm.
“Përveç kësaj, ne do të shkatërrojmë objektiva që mund të shkatërrohen lehtësisht, të cilat do ta bëjnë praktikisht të pamundur që Irani të rindërtohet ndonjëherë si komb — vdekja, zjarri dhe tërbimi do të mbretërojnë mbi ta. Por shpresoj dhe lutem që kjo të mos ndodhë”, tha ai.
