Presidenti i SHBA-ve, Donald Trump, tha në një intervistë me ‘Fox News’ sot se ka të ngjarë të flasë me Iranin, por shtoi se kjo varet nga kushtet.
Kur u pyet për mundësinë e negociatave me Teheranin, Trump tha se ka dëgjuar se “Irani është shumë i etur për të folur”.
Republikani gjithashtu përsëriti pakënaqësinë e tij me zgjedhjen e Mojtaba Khamenei si udhëheqësi i ri suprem i Iranit, duke thënë:
“Nuk mendoj se ai mund të jetojë në paqe”.
Ai theksoi gjithashtu se rezultatet e operacioneve ushtarake amerikane në Iran kanë qenë “përtej pritjeve”, duke përsëritur komentet që bëri më herët gjatë ditës gjatë një konference për shtyp.
Trump vuri në dukje se ishte i befasuar që Irani po godiste vendet e Gjirit me raketa dhe dronë.
Nga ana e tij, kreu i Këshillit Suprem të Sigurisë Kombëtare të Iranit, Ali Larijani, theksoi se vendi “nuk ka frikë” nga “kërcënimet boshe” të Trump, duke iu përgjigjur deklaratës së presidentit të SHBA-së se SHBA-të do ta godisnin Iranin “më fort” nëse Teherani bllokonte dërgesat e naftës përmes Ngushticës së Hormuzit.
“Irani nuk ka frikë nga kërcënimet tuaja boshe. Ata më të fuqishëm se ju janë përpjekur të eliminojnë kombin iranian dhe kanë dështuar. Kini kujdes të mos eliminoheni vetë!” shkroi Larijani në rrjetin “H”.
