Presidenti amerikan Donald Trump deklaroi se nuk është i interesuar për një armëpushim me Iranin, ndërsa lufta vazhdon të përshkallëzohet.
Duke folur para gazetarëve jashtë Shtëpisë së Bardhë, Trump tha se nuk ka kuptim të kërkohet armëpushim në një moment kur, sipas tij, pala tjetër po pëson humbje të mëdha.
“Nuk dua të bëj armëpushim. Nuk bën armëpushim kur po e shkatërron plotësisht kundërshtarin,” u shpreh ai.
Trump shtoi gjithashtu se beson që Shtetet e Bashkuara dhe Izraeli janë në një linjë për kohëzgjatjen e luftës. “Marrëdhënia është shumë e mirë. Ne duam pak a shumë të njëjtat gjëra. Ajo që duam është fitorja – të dyja palët,” tha ai.
Presidenti amerikan foli edhe për situatën në ngushticën strategjike të Hormuzit, duke thënë se nevojitet “shumë ndihmë” për ta siguruar atë dhe se do të ishte mirë nëse vende si Kina dhe Japonia do të përfshiheshin.
Megjithatë, ai shtoi se Shtetet e Bashkuara nuk varen nga kjo rrugë detare në të njëjtën mënyrë si Evropa dhe vendet aziatike, të cilat e përdorin shumë më tepër për furnizimin me energji.
