Presidenti amerikan Donald Trump u mburr të martën se kishte përfunduar armiqësitë mes “Aberbaijan” dhe Shqipërisë. Duke e thënë këtë, ai gaboi në emrin e një shteti dhe përmendi një tjetër që nuk kishte lidhje fare me konfliktin për të cilin po fliste, raporton Mediaite.
Më herët këtë muaj, Trump ndërmjetësoi një marrëveshje paqeje mes Azerbajxhanit dhe Armenisë, liderët e të cilëve i priti në Shtëpinë e Bardhë. Të dyja vendet kanë qenë prej kohësh në konflikt për rajonin e Nagorno-Karabakhut, të cilin Azerbajxhani e rimori nën kontroll në vitin 2023.
Trump foli të martën në emisionin The Mark Levin Show, ku përsëriti pretendimin e tij – pa shumë kontekst – se kishte zgjidhur gjashtë apo shtatë konflikte globale në shtatë muajt e parë të presidencës së tij.
“Kam zgjidhur gjashtë luftëra, dhe shumë njerëz thonë shtatë sepse është një që askush nuk e di,” tha ai në mënyrë enigmatike. “Por kam zgjidhur gjashtë luftëra, dhe ne e bëmë Iranin— ia zhdukëm kapacitetin bërthamor, që do ta kishin përdorur kundër Izraelit për dy sekonda po të kishin mundësi. Por ne ia zhdukëm.”
Pas kësaj, ai tha se konflikti mes Indisë dhe Pakistanit kishte qenë “më i lehti” për t’u zgjidhur. Më pas iu drejtua “Aberbaijan”-it dhe Shqipërisë, duke shtuar:
“Shumë gjëra të mrekullueshme. Ju e patë Aberbaijan. Ajo ishte e madhe, kishte 34, 35 vite që vazhdonte me, uh, Shqipërinë. Mendoni pak. Vite me radhë, dhe unë njoha krerët, i njoha përmes tregtisë. Po merresha pak me ta dhe u thashë: ‘Pse po luftoni?’ Pastaj u thashë: ‘Nuk do bëj marrëveshje tregtare nëse do vazhdoni të luftoni. Është çmenduri.’
Pastaj një gjë çoi tek tjetra dhe unë e zgjidha. Dhe ajo ishte një nga ato që njerëzit thoshin se nuk mund të zgjidhej. Edhe kur i pata të dy në Zyrën Ovale në fund, kur po përgatiteshin të nënshkruanin, ishin ulur pranë njëri-tjetrit por përpiqeshin të largoheshin. Nuk ndiheshin mirë. Pas një ore po përqafonin njëri-tjetrin dhe uronin njëri-tjetrin. Ishte e bukur për t’u parë.”
